၁. ထောမကတ္ထေရအပဒါနံ

၁. ‘‘ဒေဝလောကေ ဌိတော သန္တော၊ ဝိပဿိဿ မဟေသိနော၊

ဓမ္မံ သုဏိတွာ မုဒိတော၊ ဣမံ ဝါစံ အဘာသဟံ.

၂. ‘‘‘နမော တေ ပုရိသာဇည၊ နမော တေ ပုရိသုတ္တမ၊

ဗဟုဇ္ဇနံ [ဗဟုံ ဇနံ (သီ.)] တာရယသိ၊ ဒေသေန္တော အမတံ ပဒံ’.

၃. ‘‘ဧကနဝုတိတော ကပ္ပေ၊ ယံ ဝါစမဘဏိံ တဒါ၊

ဒုဂ္ဂတိံ နာဘိဇာနာမိ၊ ထောမနာယ ဣဒံ ဖလံ.

၄. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ထောမကော ထေရော ဣမာ ဂါထာယော အဘာသိတ္ထာတိ.

ထောမကတ္ထေရဿာပဒါနံ ပဌမံ.