၁. တုဝရဒါယကတ္ထေရအပဒါနံ

၁. ‘‘မိဂလုဒ္ဒေါ ပုရေ အာသိံ၊ အရညေ ကာနနေ အဟံ၊

ဘရိတွာ တုဝရမာဒါယ [ဘရိတွာ တုရဝမာဒါယ (က.)၊ ဘဇ္ဇိတံ တုဝရမာဒါယ (?) ဧတ္ထ တုဝရန္တိ မုဂ္ဂကလာယသဒိသံ တုဝရဋ္ဌိန္တိ တဒဋ္ဌကထာ၊ တုဝရော ဓညဘေဒေတိ သက္ကတာဘိဓာနေ]၊ သံဃဿ အဒဒိံ အဟံ.

၂. ‘‘ဧကနဝုတိတော ကပ္ပေ၊ ယံ ဒါနမဒဒိံ တဒါ၊

ဒုဂ္ဂတိံ နာဘိဇာနာမိ၊ တုဝရဿ ဣဒံ ဖလံ.

၃. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ တုဝရဒါယကော ထေရော ဣမာ ဂါထာယော အဘာသိတ္ထာတိ.

တုဝရဒါယကတ္ထေရဿာပဒါနံ ပဌမံ.