၃. သာလပုပ္ဖိယတ္ထေရအပဒါနံ

၉. ‘‘အရုဏဝတိယာ နဂရေ၊ အဟောသိံ ပူပိကော တဒါ၊

မမ ဒွါရေန ဂစ္ဆန္တံ၊ သိခိနံ အဒ္ဒသံ ဇိနံ.

၁၀. ‘‘ဗုဒ္ဓဿ ပတ္တံ ပဂ္ဂယှ၊ သာလပုပ္ဖံ အဒါသဟံ၊

သမ္မဂ္ဂတဿ ဗုဒ္ဓဿ၊ ဝိပ္ပသန္နေန စေတသာ.

၁၁. ‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိဒါသဟံ [ယံ ခဇ္ဇကမဒါသဟံ (သီ.)၊ ယံ ခဇ္ဇမဘိဒါသဟံ (က.) သာလပုပ္ဖနာမကံ ခဇ္ဇကံ ဝါ ဘဝေယျ]၊

ဒုဂ္ဂတိံ နာဘိဇာနာမိ၊ သာလပုပ္ဖဿိဒံ ဖလံ.

၁၂. ‘‘ဣတော စုဒ္ဒသကပ္ပမှိ၊ အဟောသိံ အမိတဉ္ဇလော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၁၃. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သာလပုပ္ဖိယော ထေရော ဣမာ ဂါထာယော အဘာသိတ္ထာတိ.

သာလပုပ္ဖိယတ္ထေရဿာပဒါနံ တတိယံ.