၄. ကိလဉ္ဇဒါယကတ္ထေရအပဒါနံ

၁၄. ‘‘တိဝရာယံ ပုရေ ရမ္မေ၊ နဠကာရော အဟံ တဒါ၊

သိဒ္ဓတ္ထေ လောကပဇ္ဇောတေ၊ ပသန္နာ ဇနတာ တဟိံ.

၁၅. ‘‘ပူဇတ္ထံ လောကနာထဿ၊ ကိလဉ္ဇံ ပရိယေသတိ၊

ဗုဒ္ဓပူဇံ ကရောန္တာနံ၊ ကိလဉ္ဇံ အဒဒိံ အဟံ.

၁၆. ‘‘စတုန္နဝုတိတော ကပ္ပေ၊ ယံ ကမ္မမကရိံ တဒါ၊

ဒုဂ္ဂတိံ နာဘိဇာနာမိ၊ ကိလဉ္ဇဿ ဣဒံ ဖလံ.

၁၇. ‘‘သတ္တသတ္တတိကပ္ပမှိ၊ ရာဇာ အာသိံ ဇလဒ္ဓရော [ဇုတိန္ဓရော (သီ.)]၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၁၈. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ကိလဉ္ဇဒါယကော ထေရော ဣမာ ဂါထာယော အဘာသိတ္ထာတိ.

ကိလဉ္ဇဒါယကတ္ထေရဿာပဒါနံ စတုတ္ထံ.