၉. သပ္ပိဒါယကတ္ထေရအပဒါနံ

၄၄. ‘‘နိသိန္နော ပါသာဒဝရေ၊ နာရီဂဏပုရက္ခတော၊

ဗျာဓိတံ သမဏံ ဒိသွာ၊ အဘိနာမေသဟံ ဃရံ.

၄၅. ‘‘ဥပဝိဋ္ဌံ မဟာဝီရံ၊ ဒေဝဒေဝံ နရာသဘံ၊

သပ္ပိတေလံ မယာ ဒိန္နံ၊ သိဒ္ဓတ္ထဿ မဟေသိနော.

၄၆. ‘‘ပဿဒ္ဓဒရထံ ဒိသွာ၊ ဝိပ္ပသန္နမုခိန္ဒြိယံ၊

ဝန္ဒိတွာ သတ္ထုနော ပါဒေ၊ အနုသံသာဝယိံ ပုရေ.

၄၇. ‘‘ဒိသွာ မံ သုပ္ပသန္နတ္တံ [သုပ္ပသန္နန္တံ (သျာ. က.) သုပ္ပသန္နစိတ္တန္တိ အတ္ထော]၊ ဣဒ္ဓိယာ ပါရမိင်္ဂတော၊

နဘံ အဗ္ဘုဂ္ဂမီ ဓီရော၊ ဟံသရာဇာဝ အမ္ဗရေ.

၄၈. ‘‘စတုန္နဝုတိတော ကပ္ပေ၊ ယံ ဒါနမဒဒိံ တဒါ၊

ဒုဂ္ဂတိံ နာဘိဇာနာမိ၊ သပ္ပိတေလဿိဒံ ဖလံ.

၄၉. ‘‘ဣတော သတ္တရသေ ကပ္ပေ၊ ဇုတိဒေဝ [ဒုတိဒေဝ (သျာ.)၊ တုတိဒေဝ (က.)] သနာမကော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၅၀. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သပ္ပိဒါယကော ထေရော ဣမာ ဂါထာယော အဘာသိတ္ထာတိ.

သပ္ပိဒါယကတ္ထေရဿာပဒါနံ နဝမံ.