၈. အက္ကန္တသညကတ္ထေရအပဒါနံ

၃၇. ‘‘ကုသာဋကံ ဂဟေတွာန၊ ဥပဇ္ဈာယဿဟံ ပုရေ၊

မန္တဉ္စ အနုသိက္ခာမိ၊ ဂန္ထာဒေါသဿ [ကဏ္ဍဘေဒဿ (သီ.)၊ ဂဏ္ဍဘေဒဿ (သျာ.)] ပတ္တိယာ.

၃၈. ‘‘အဒ္ဒသံ ဝိရဇံ ဗုဒ္ဓံ၊ အာဟုတီနံ ပဋိဂ္ဂဟံ၊

ဥသဘံ ပဝရံ အဂ္ဂံ၊ တိဿံ ဗုဒ္ဓံ ဂဏုတ္တမံ [ဂဇုတ္တမံ (သျာ.)].

၃၉. ‘‘ကုသာဋကံ ပတ္ထရိတံ၊ အက္ကမန္တံ နရုတ္တမံ၊

သမုဂ္ဂတံ မဟာဝီရံ၊ လောကဇေဋ္ဌံ နရာသဘံ.

၄၀. ‘‘ဒိသွာ တံ လောကပဇ္ဇောတံ၊ ဝိမလံ စန္ဒသန္နိဘံ၊

အဝန္ဒိံ သတ္ထုနော ပါဒေ၊ ဝိပ္ပသန္နေန စေတသာ.

၄၁. ‘‘စတုန္နဝုတိတော ကပ္ပေ၊ ယံ အဒါသိံ ကုသာဋကံ၊

ဒုဂ္ဂတိံ နာဘိဇာနာမိ၊ ကုသာဋကဿိဒံ ဖလံ.

၄၂. ‘‘သတ္တတိံသေ ဣတော ကပ္ပေ၊ ဧကော အာသိံ ဇနာဓိပေါ၊

သုနန္ဒော နာမ နာမေန၊ စက္ကဝတ္တီ မဟဗ္ဗလော.

၄၃. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အက္ကန္တသညကော ထေရော ဣမာ ဂါထာယော အဘာသိတ္ထာတိ၊

အက္ကန္တသညကတ္ထေရဿာပဒါနံ အဋ္ဌမံ.