၇. တာလဝဏ္ဋဒါယကတ္ထေရအပဒါနံ

၃၁. ‘‘တာလဝဏ္ဋံ မယာ ဒိန္နံ၊ တိဿဿာဒိစ္စဗန္ဓုနော၊

ဂိမှနိဗ္ဗာပနတ္ထာယ၊ ပရိဠာဟောပသန္တိယာ.

၃၂. ‘‘သန္နိဗ္ဗာပေမိ ရာဂဂ္ဂိံ၊ ဒေါသဂ္ဂိဉ္စ တဒုတ္တရိံ၊

နိဗ္ဗာပေမိ စ မောဟဂ္ဂိံ၊ တာလဝဏ္ဋဿိဒံ ဖလံ.

၃၃. ‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ၊

ဓာရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ.

၃၄. ‘‘ဒွေနဝုတေ ဣတော ကပ္ပေ၊ ယံ ကမ္မမကရိံ တဒါ၊

ဒုဂ္ဂတိံ နာဘိဇာနာမိ၊ တာလဝဏ္ဋဿိဒံ ဖလံ.

၃၅. ‘‘တေသဋ္ဌိမှိ ဣတော ကပ္ပေ၊ မဟာနာမသနာမကော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၃၆. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ တာလဝဏ္ဋဒါယကော ထေရော ဣမာ ဂါထာယော အဘာသိတ္ထာတိ.

တာလဝဏ္ဋဒါယကတ္ထေရဿာပဒါနံ သတ္တမံ.