၆. သန္ဓိတတ္ထေရအပဒါနံ

၂၇. ‘‘အဿတ္ထေ ဟရိတောဘာသေ၊ သံဝိရူဠှမှိ ပါဒပေ၊

ဧကံ ဗုဒ္ဓဂတံ သညံ၊ အလဘိံဟံ [အလဘိဿံ (သီ.)] ပတိဿတော.

၂၈. ‘‘ဧကတ္တိံသေ ဣတော ကပ္ပေ၊ ယံ သညမလဘိံ တဒါ၊

တဿာ သညာယ ဝါဟသာ၊ ပတ္တော မေ အာသဝက္ခယော.

၂၉. ‘‘ဣတော တေရသကပ္ပမှိ၊ ဓနိဋ္ဌော နာမ ခတ္တိယော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၃၀. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သန္ဓိတော [သဏ္ဌိတော (သီ.)] ထေရော ဣမာ ဂါထာယော အဘာသိတ္ထာတိ.

သန္ဓိတတ္ထေရဿာပဒါနံ ဆဋ္ဌံ.