၃. သစ္စသညကတ္ထေရအပဒါနံ

၁၁. ‘‘ဝေဿဘူ တမှိ သမယေ၊ ဘိက္ခုသံဃပုရက္ခတော၊

ဒေသေတိ အရိယသစ္စာနိ၊ နိဗ္ဗာပေန္တော မဟာဇနံ.

၁၂. ‘‘ပရမကာရုညပတ္တောမှိ၊ သမိတိံ အဂမာသဟံ၊

သောဟံ နိသိန္နကော သန္တော၊ ဓမ္မမဿောသိ သတ္ထုနော.

၁၃. ‘‘တဿာဟံ ဓမ္မံ သုတွာန၊ ဒေဝလောကံ အဂစ္ဆဟံ၊

တိံသကပ္ပါနိ ဒေဝေသု၊ အဝသိံ တတ္ထဟံ ပုရေ.

၁၄. ‘‘ဧကတ္တိံသေ ဣတော ကပ္ပေ၊ ယံ သညမလဘိံ တဒါ၊

ဒုဂ္ဂတိံ နာဘိဇာနာမိ၊ သစ္စသညာယိဒံ ဖလံ.

၁၅. ‘‘ဆဗ္ဗီသမှိ ဣတော ကပ္ပေ၊ ဧကော အာသိံ ဇနာဓိပေါ၊

ဧကဖုသိတနာမေန၊ စက္ကဝတ္တီ မဟဗ္ဗလော.

၁၆. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သစ္စသညကော ထေရော ဣမာ ဂါထာယော အဘာသိတ္ထာတိ.

သစ္စသညကတ္ထေရဿာပဒါနံ တတိယံ.