၂. ပါနဓိဒါယကတ္ထေရအပဒါနံ

၆. ‘‘အာရညိကဿ ဣသိနော၊ စိရရတ္တတပဿိနော [ဈာယိနော၊ မေတ္တစိတ္တတပဿိနော (သျာ.)]၊

ဗုဒ္ဓဿ [ဓမ္မဿ (သျာ. က.)] ဘာဝိတတ္တဿ၊ အဒါသိံ ပါနဓိံ အဟံ.

၇. ‘‘တေန ကမ္မေန ဒွိပဒိန္ဒ၊ လောကဇေဋ္ဌ နရာသဘ၊

ဒိဗ္ဗယာနံ [သဗ္ဗံ ယာနံ (သီ.)] အနုဘောမိ၊ ပုဗ္ဗကမ္မဿိဒံ ဖလံ.

၈. ‘‘စတုန္နဝုတေ ဣတော ကပ္ပေ၊ ယံ ကမ္မမကရိံ တဒါ၊

ဒုဂ္ဂတိံ နာဘိဇာနာမိ၊ ပါနဓိဿ ဣဒံ ဖလံ.

၉. ‘‘သတ္တသတ္တတိတော ကပ္ပေ၊ အဋ္ဌ အာသိံသု ခတ္တိယာ၊

သုယာနာ နာမ နာမေန၊ စက္ကဝတ္တီ မဟဗ္ဗလာ.

၁၀. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပါနဓိဒါယကော ထေရော ဣမာ ဂါထာယော အဘာသိတ္ထာတိ.

ပါနဓိဒါယကတ္ထေရဿာပဒါနံ ဒုတိယံ.