၁. ဟတ္ထိဒါယကတ္ထေရအပဒါနံ

၁. ‘‘သိဒ္ဓတ္ထဿ ဘဂဝတော၊ ဒွိပဒိန္ဒဿ တာဒိနော၊

နာဂသေဋ္ဌော မယာ ဒိန္နော၊ ဤသာဒန္တော ဥရူဠှဝါ.

၂. ‘‘ဥတ္တမတ္ထံ အနုဘောမိ၊ သန္တိပဒမနုတ္တရံ၊

နာဂဒါနံ [အဂ္ဂဒါနံ (သီ. က.)] မယာ ဒိန္နံ၊ သဗ္ဗလောကဟိတေသိနော.

၃. ‘‘စတုန္နဝုတိတော ကပ္ပေ၊ ယံ နာဂ [ဒါန (သီ. က.)] မဒဒိံ တဒါ၊

ဒုဂ္ဂတိံ နာဘိဇာနာမိ၊ နာဂဒါနဿိဒံ ဖလံ.

၄. ‘‘အဋ္ဌသတ္တတိကပ္ပမှိ၊ သောဠသာသိံသု ခတ္တိယာ၊

သမန္တပါသာဒိကာ နာမ၊ စက္ကဝတ္တီ မဟဗ္ဗလာ.

၅. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဟတ္ထိဒါယကော ထေရော ဣမာ ဂါထာယော အဘာသိတ္ထာတိ.

ဟတ္ထိဒါယကတ္ထေရဿာပဒါနံ ပဌမံ.