၈. ကောရဏ္ဍပုပ္ဖိယတ္ထေရအပဒါနံ

၃၅. ‘‘အက္ကန္တဉ္စ ပဒံ ဒိသွာ၊ စက္ကာလင်္ကာရဘူသိတံ၊

ပဒေနာနုပဒံ ယန္တော၊ ဝိပဿိဿ မဟေသိနော.

၃၆. ‘‘ကောရဏ္ဍံ ပုပ္ဖိတံ ဒိသွာ၊ သမူလံ ပူဇိတံ မယာ၊

ဟဋ္ဌော ဟဋ္ဌေန စိတ္တေန၊ အဝန္ဒိံ ပဒမုတ္တမံ.

၃၇. ‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၃၈. ‘‘သတ္တပညာသကပ္ပမှိ၊ ဧကော ဝီတမလော အဟုံ၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၃၉. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ကောရဏ္ဍပုပ္ဖိယော ထေရော ဣမာ ဂါထာယော အဘာသိတ္ထာတိ.

ကောရဏ္ဍပုပ္ဖိယတ္ထေရဿာပဒါနံ အဋ္ဌမံ.