၃. ခဏ္ဍပုလ္လိယတ္ထေရအပဒါနံ

၁၂. ‘‘ဖုဿဿ ခေါ ဘဂဝတော၊ ထူပေါ အာသိ မဟာဝနေ၊

ကုဉ္ဇရေဟိ တဒါ ဘိန္နော၊ ပရူဠှော ပါဒပေါ [ပရူဠှပါဒပေါ (သီ.)၊ သံရူဠှော ပါဒပေါ (သျာ.)] တဟိံ.

၁၃. ‘‘ဝိသမဉ္စ သမံ ကတွာ၊ သုဓာပိဏ္ဍံ အဒါသဟံ၊

တိလောကဂရုနော တဿ၊ ဂုဏေဟိ ပရိတောသိတော [ပရိတော သုတော (က.)].

၁၄. ‘‘ဒွေနဝုတေ ဣတော ကပ္ပေ၊ ယံ ကမ္မမကရိံ တဒါ၊

ဒုဂ္ဂတိံ နာဘိဇာနာမိ၊ သုဓာပိဏ္ဍဿိဒံ ဖလံ.

၁၅. ‘‘သတ္တသတ္တတိကပ္ပမှိ၊ ဇိတသေနာသုံ သောဠသ၊

သတ္တရတနသမ္ပန္နာ၊ စက္ကဝတ္တီ မဟဗ္ဗလာ.

၁၆. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ခဏ္ဍဖုလ္လိယော ထေရော ဣမာ ဂါထာယော အဘာသိတ္ထာတိ.

ခဏ္ဍပုလ္လိယတ္ထေရဿာပဒါနံ တတိယံ.