၄. အသောကပူဇကတ္ထေရအပဒါနံ

၁၇. ‘‘တိဝရာယံ [တိပုရာယံ (သျာ.)] ပုရေ ရမ္မေ၊ ရာဇုယျာနံ အဟု တဒါ၊

ဥယျာနပါလော တတ္ထာသိံ၊ ရညော ဗဒ္ဓစရော အဟံ.

၁၈. ‘‘ပဒုမော နာမ နာမေန၊ သယမ္ဘူ သပ္ပဘော အဟု၊

နိသိန္နံ [နိသိန္နော (က.)] ပုဏ္ဍရီကမှိ၊ ဆာယာ န ဇဟိ တံ မုနိံ.

၁၉. ‘‘အသောကံ ပုပ္ဖိတံ ဒိသွာ၊ ပိဏ္ဍိဘာရံ သုဒဿနံ၊

ဗုဒ္ဓဿ အဘိရောပေသိံ၊ ဇလဇုတ္တမနာမိနော.

၂၀. ‘‘စတုန္နဝုတိတော ကပ္ပေ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၂၁. ‘‘သတ္တတိံသမှိတော ကပ္ပေ၊ သောဠသ အရဏဉ္ဇဟာ [အရုဏဉ္ဇဟာ (သီ.)]၊

သတ္တရတနသမ္ပန္နာ၊ စက္ကဝတ္တီ မဟဗ္ဗလာ.

၂၂. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အသောကပူဇကော ထေရော ဣမာ ဂါထာယော အဘာသိတ္ထာတိ.

အသောကပူဇကတ္ထေရဿာပဒါနံ စတုတ္ထံ.