၂. တိဏသန္ထာရကတ္ထေရအပဒါနံ

၆. ‘‘ယဒါ ဝနဝါသီ [ယံ ဒါယဝါသိကော (သီ.)] ဣသိ၊ တိဏံ လာယတိ သတ္ထုနော၊

သဗ္ဗေ ပဒက္ခိဏာဝဋ္ဋာ [ပဒက္ခိဏာဝတ္တာ (သီ. သျာ.)]၊ ပထဗျာ [ပုထဝျာ (သီ.)] နိပတိံသု တေ.

၇. ‘‘တမဟံ တိဏမာဒါယ၊ သန္ထရိံ ဓရဏုတ္တမေ၊

တီဏေဝ တာလပတ္တာနိ၊ အာဟရိတွာနဟံ တဒါ.

၈. ‘‘တိဏေန ဆဒနံ ကတွာ၊ သိဒ္ဓတ္ထဿ အဒါသဟံ၊

သတ္တာဟံ ဓာရယုံ တဿ [တတ္ထ (သျာ.)]၊ ဒေဝမာနုသသတ္ထုနော.

၉. ‘‘စတုန္နဝုတိတော ကပ္ပေ၊ ယံ တိဏံ အဒဒိံ တဒါ၊

ဒုဂ္ဂတိံ နာဘိဇာနာမိ၊ တိဏဒါနဿိဒံ ဖလံ.

၁၀. ‘‘ပဉ္စသဋ္ဌိမှိတော ကပ္ပေ၊ စတ္တာရောသုံ မဟဒ္ဓနာ၊

သတ္တရတနသမ္ပန္နာ၊ စက္ကဝတ္တီ မဟဗ္ဗလာ.

၁၁. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ တိဏသန္ထာရကော ထေရော ဣမာ ဂါထာယော အဘာသိတ္ထာတိ.

တိဏသန္ထာရကတ္ထေရဿာပဒါနံ ဒုတိယံ.