၁. တမာလပုပ္ဖိယတ္ထေရအပဒါနံ

၁. ‘‘စုလ္လာသီတိသဟဿာနိ၊ ထမ္ဘာ သောဝဏ္ဏယာ အဟူ၊

ဒေဝလဋ္ဌိပဋိဘာဂံ၊ ဝိမာနံ မေ သုနိမ္မိတံ.

၂. ‘‘တမာလပုပ္ဖံ ပဂ္ဂယှ၊ ဝိပ္ပသန္နေန စေတသာ၊

ဗုဒ္ဓဿ အဘိရောပယိံ၊ သိခိနော လောကဗန္ဓုနော.

၃. ‘‘ဧကတ္တိံသေ ဣတော ကပ္ပေ၊ ယံ ကမ္မမကရိံ တဒါ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၄. ‘‘ဣတော ဝီသတိမေ ကပ္ပေ၊ စန္ဒတိတ္တောတိ ဧကကော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၅. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ တမာလပုပ္ဖိယော ထေရော ဣမာ ဂါထာယော အဘာသိတ္ထာတိ.

တမာလပုပ္ဖိယတ္ထေရဿာပဒါနံ ပဌမံ.