၇. သောဝဏ္ဏဝဋံသကိယတ္ထေရအပဒါနံ

၃၄. ‘‘ဥယျာနဘူမိံ နိယျန္တော၊ အဒ္ဒသံ လောကနာယကံ၊

ဝဋံသကံ ဂဟေတွာန၊ သောဝဏ္ဏံ သာဓုနိမ္မိတံ.

၃၅. ‘‘သီဃံ တတော သမာရုယှ၊ ဟတ္ထိက္ခန္ဓဂတော အဟံ၊

ဗုဒ္ဓဿ အဘိရောပေသိံ၊ သိခိနော လောကဗန္ဓုနော.

၃၆. ‘‘ဧကတ္တိံသေ ဣတော ကပ္ပေ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ ပုပ္ဖပူဇာယိဒံ ဖလံ.

၃၇. ‘‘သတ္တဝီသေ ဣတော ကပ္ပေ၊ ဧကော အာသိံ ဇနာဓိပေါ၊

မဟာပတာပနာမေန၊ စက္ကဝတ္တီ မဟဗ္ဗလော.

၃၈. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သောဝဏ္ဏဝဋံသကိယော ထေရော ဣမာ ဂါထာယော အဘာသိတ္ထာတိ.

သောဝဏ္ဏဝဋံသကိယတ္ထေရဿာပဒါနံ သတ္တမံ.