၆. အင်္ကောလပုပ္ဖိယတ္ထေရအပဒါနံ

၂၉. ‘‘နာရဒေါ [ဝရဒေါ (က.)] ဣတိ မေ နာမံ၊ ကဿပေါ ဣတိ မံ ဝိဒူ၊

အဒ္ဒသံ သမဏာနဂ္ဂံ၊ ဝိပဿိံ ဒေဝသက္ကတံ.

၃၀. ‘‘အနုဗျဉ္ဇနဓရံ ဗုဒ္ဓံ၊ အာဟုတီနံ ပဋိဂ္ဂဟံ၊

အင်္ကောလပုပ္ဖံ [ဝကုလပုပ္ဖံ (သျာ.)၊ ဗကောလပုပ္ဖံ (က.)] ပဂ္ဂယှ၊ ဗုဒ္ဓဿ အဘိရောပယိံ.

၃၁. ‘‘ဧကနဝုတိတော ကပ္ပေ၊ ယံ ပုပ္ဖမဘိပူဇယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၃၂. ‘‘စတုသတ္တတိတော ကပ္ပေ၊ ရောမသော နာမ ခတ္တိယော၊

အာမုက္ကမာလာဘရဏော၊ သယောဂ္ဂဗလဝါဟနော.

၃၃. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အင်္ကောလပုပ္ဖိယော [ဝကုလပုပ္ဖိယော (သျာ.)၊ ဗကောလပုပ္ဖိယော (က.)] ထေရော ဣမာ ဂါထာယော အဘာသိတ္ထာတိ.

အင်္ကောလပုပ္ဖိယတ္ထေရဿာပဒါနံ ဆဋ္ဌံ.