၅. အဗျာဓိကတ္ထေရအပဒါနံ

၂၄. ‘‘ဝိပဿိဿ ဘဂဝတော၊ အဂ္ဂိသာလံ အဒါသဟံ၊

ဗျာဓိကာနဉ္စ အာဝါသံ၊ ဥဏှောဒကပဋိဂ္ဂဟံ.

၂၅. ‘‘တေန ကမ္မေနယံ မယှံ၊ အတ္တဘာဝေါ သုနိမ္မိတော၊

ဗျာဓာဟံ နာဘိဇာနာမိ၊ ပုညကမ္မဿိဒံ ဖလံ.

၂၆. ‘‘ဧကနဝုတိတော ကပ္ပေ၊ ယံ သာလမဒဒိံ တဒါ၊

ဒုဂ္ဂတိံ နာဘိဇာနာမိ၊ အဂ္ဂိသာလာယိဒံ ဖလံ.

၂၇. ‘‘ဣတော စ သတ္တမေ ကပ္ပေ၊ ဧကောသိံ အပရာဇိတော [ဧကော အာသိံ နရာဓိပေါ (သျာ.)]၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၂၈. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အဗျာဓိကော ထေရော ဣမာ ဂါထာယော အဘာသိတ္ထာတိ.

အဗျာဓိကတ္ထေရဿာပဒါနံ ပဉ္စမံ.