၄. အာရက္ခဒါယကတ္ထေရအပဒါနံ

၁၉. ‘‘သိဒ္ဓတ္ထဿ ဘဂဝတော၊ ဝေဒိ ကာရာပိတာ [ဝေဒိကာ ကာရိတာ (သျာ.)] မယာ၊

အာရက္ခော စ မယာ ဒိန္နော၊ သုဂတဿ မဟေသိနော.

၂၀. ‘‘တေန ကမ္မဝိသေသေန၊ န ပဿိံ ဘယဘေရဝံ၊

ကုဟိဉ္စိ ဥပပန္နဿ၊ တာသော မယှံ န ဝိဇ္ဇတိ.

၂၁. ‘‘စတုန္နဝုတိတော ကပ္ပေ၊ ယံ ဝေဒိံ ကာရယိံ ပုရေ၊

ဒုဂ္ဂတိံ နာဘိဇာနာမိ၊ ဝေဒိကာယ ဣဒံ ဖလံ.

၂၂. ‘‘ဣတော ဆဋ္ဌမှိ ကပ္ပမှိ၊ အပဿေနသနာမကော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၂၃. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အာရက္ခဒါယကော ထေရော ဣမာ ဂါထာယော အဘာသိတ္ထာတိ.

အာရက္ခဒါယကတ္ထေရဿာပဒါနံ စတုတ္ထံ.