၃. ဒွေရတနိယတ္ထေရအပဒါနံ

၁၂. ‘‘မိဂလုဒ္ဒေါ ပုရေ အာသိံ၊ အရညေ ကာနနေ အဟံ၊

အဒ္ဒသံ ဝိရဇံ ဗုဒ္ဓံ၊ အာဟုတီနံ ပဋိဂ္ဂဟံ.

၁၃. ‘‘မံသပေသိ မယာ ဒိန္နာ၊ ဝိပဿိဿ မဟေသိနော၊

သဒေဝကသ္မိံ လောကသ္မိံ၊ ဣဿရံ ကာရယာမဟံ.

၁၄. ‘‘ဣမိနာ မံသဒါနေန၊ ရတနံ နိဗ္ဗတ္တတေ မမ၊

ဒုဝေမေ ရတနာ လောကေ၊ ဒိဋ္ဌဓမ္မဿ ပတ္တိယာ.

၁၅. ‘‘တေဟံ သဗ္ဗေ အနုဘောမိ၊ မံသဒါနဿ သတ္တိယာ၊

ဂတ္တဉ္စ မုဒုကံ မယှံ၊ ပညာ နိပုဏဝေဒနီ.

၁၆. ‘‘ဧကနဝုတိတော ကပ္ပေ၊ ယံ မံသမဒဒိံ တဒါ၊

ဒုဂ္ဂတိံ နာဘိဇာနာမိ၊ မံသဒါနဿိဒံ ဖလံ.

၁၇. ‘‘ဣတော စတုတ္ထကေ ကပ္ပေ၊ ဧကော အာသိံ ဇနာဓိပေါ၊

မဟာရောဟိတနာမော သော၊ စက္ကဝတ္တီ မဟဗ္ဗလော.

၁၈. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဒွေရတနိယော [ဒွိရတနိယော (သီ.)] ထေရော ဣမာ ဂါထာယော အဘာသိတ္ထာတိ.

ဒွေရတနိယတ္ထေရဿာပဒါနံ တတိယံ.

ဒသမံ ဘာဏဝါရံ.