၂. အဇိနဒါယကတ္ထေရအပဒါနံ

၆. ‘‘ဧကတ္တိံသေ ဣတော ကပ္ပေ၊ ဂဏသတ္ထာရကော အဟံ၊

အဒ္ဒသံ ဝိရဇံ ဗုဒ္ဓံ၊ အာဟုတီနံ ပဋိဂ္ဂဟံ.

၇. ‘‘စမ္မခဏ္ဍံ မယာ ဒိန္နံ၊ သိခိနော လောကဗန္ဓုနော၊

တေန ကမ္မေန ဒွိပဒိန္ဒ၊ လောကဇေဋ္ဌ နရာသဘ.

၈. ‘‘သမ္ပတ္တိံ အနုဘောတွာန၊ ကိလေသေ ဈာပယိံ အဟံ၊

ဓာရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ.

၉. ‘‘ဧကတ္တိံသေ ဣတော ကပ္ပေ၊ အဇိနံ ယံ အဒါသဟံ၊

ဒုဂ္ဂတိံ နာဘိဇာနာမိ၊ အဇိနဿ ဣဒံ ဖလံ.

၁၀. ‘‘ဣတော ပဉ္စမကေ ကပ္ပေ၊ ရာဇာ အာသိံ သုဒါယကော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၁၁. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အဇိနဒါယကော ထေရော ဣမာ ဂါထာယော အဘာသိတ္ထာတိ.

အဇိနဒါယကတ္ထေရဿာပဒါနံ ဒုတိယံ.