၁. အာလမ္ဗဏဒါယကတ္ထေရအပဒါနံ

၁. ‘‘အတ္ထဒဿိဿ ဘဂဝတော၊ လောကဇေဋ္ဌဿ တာဒိနော၊

အာလမ္ဗဏံ မယာ ဒိန္နံ၊ ဒွိပဒိန္ဒဿ တာဒိနော.

၂. ‘‘ဓရဏိံ ပဋိပဇ္ဇာမိ၊ ဝိပုလံ သာဂရပ္ပရံ၊

ပါဏေသု စ ဣဿရိယံ၊ ဝတ္တေမိ ဝသုဓာယ စ.

၃. ‘‘ကိလေသာ ဈာပိတာ မယှံ၊ ဘဝါ သဗ္ဗေ သမူဟတာ၊

တိဿော ဝိဇ္ဇာ အနုပ္ပတ္တာ၊ ကတံ ဗုဒ္ဓဿ သာသနံ.

၄. ‘‘ဣတော ဒွေသဋ္ဌိကပ္ပမှိ၊ တယော အာသိံသု ခတ္တိယာ၊

ဧကာပဿိတနာမာ တေ၊ စက္ကဝတ္တီ မဟဗ္ဗလာ.

၅. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အာလမ္ဗဏဒါယကော ထေရော ဣမာ ဂါထာယော အဘာသိတ္ထာတိ.

အာလမ္ဗဏဒါယကတ္ထေရဿာပဒါနံ ပဌမံ.