၅. ဣသိမုဂ္ဂဒါယကတ္ထေရအပဒါနံ

၂၄. ‘‘ဥဒေန္တံ သတရံသိံဝ၊ ပီတရံသိံဝ [သိတရံသိံဝ (သီ.)] ဘာဏုမံ၊

ကကုဓံ ဝိလသန္တံဝ၊ ပဒုမုတ္တရနာယကံ.

၂၅. ‘‘ဣသိမုဂ္ဂါနိ ပိသိတွာ [ဣသိသုဂ္ဂါနိ ပိံသေတွာ (သီ.)၊ ဣသိမုဂ္ဂံ နိမန္တေတွာ (သျာ.)]၊ မဓုခုဒ္ဒေ အနီဠကေ၊

ပါသာဒေဝ ဌိတော သန္တော၊ အဒါသိံ လောကဗန္ဓုနော.

၂၆. ‘‘အဋ္ဌသတသဟဿာနိ၊ အဟေသုံ ဗုဒ္ဓသာဝကာ၊

သဗ္ဗေသံ ပတ္တပူရေန္တံ [ပတ္တပူရံ တံ (သီ.)]၊ တတော စာပိ ဗဟုတ္တရံ.

၂၇. ‘‘တေန စိတ္တပ္ပသာဒေန၊ သုက္ကမူလေန စောဒိတော၊

ကပ္ပါနံ သတသဟဿံ၊ ဒုဂ္ဂတိံ နုပပဇ္ဇဟံ.

၂၈. ‘‘စတ္တာလီသမှိ သဟဿေ၊ ကပ္ပါနံ အဋ္ဌတိံသ တေ၊

ဣသိမုဂ္ဂသနာမာ [မဟိသမန္တနာမာ (သျာ.)] တေ၊ စက္ကဝတ္တီ မဟဗ္ဗလာ.

၂၉. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဣသိမုဂ္ဂဒါယကော ထေရော ဣမာ ဂါထာယော အဘာသိတ္ထာတိ.

ဣသိမုဂ္ဂဒါယကတ္ထေရဿာပဒါနံ ပဉ္စမံ.