၆. ဗောဓိဥပဋ္ဌာကတ္ထေရအပဒါနံ
၃၀. ‘‘နဂရေ ရမ္မဝတိယာ၊ အာသိံ မုရဇဝါဒကော၊
နိစ္စုပဋ္ဌာနယုတ္တောမှိ၊ ဂတောဟံ ဗောဓိမုတ္တမံ.
၃၁. ‘‘သာယံ ပါတံ ဥပဋ္ဌိတွာ၊ သုက္ကမူလေန စောဒိတော၊
အဋ္ဌာရသကပ္ပသတေ၊ ဒုဂ္ဂတိံ နုပပဇ္ဇဟံ.
၃၂. ‘‘ပန္နရသေ ကပ္ပသတေ၊ ဣတော အာသိံ ဇနာဓိပေါ၊
မုရဇော [ဒမထော (သျာ.)] နာမ နာမေန၊ စက္ကဝတ္တီ မဟဗ္ဗလော.
၃၃. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.
ဣတ္ထံ သုဒံ အာယသ္မာ ဗောဓိဥပဋ္ဌာကော ထေရော ဣမာ ဂါထာယော အဘာသိတ္ထာတိ.
ဗောဓိဥပဋ္ဌာကတ္ထေရဿာပဒါနံ ဆဋ္ဌံ.