၉. တိကိစ္ဆကတ္ထေရအပဒါနံ

၃၉. ‘‘နဂရေ ဗန္ဓုမတိယာ၊ ဝေဇ္ဇော အာသိံ သုသိက္ခိတော၊

အာတုရာနံ သဒုက္ခာနံ၊ မဟာဇနသုခါဝဟော.

၄၀. ‘‘ဗျာဓိတံ သမဏံ ဒိသွာ၊ သီလဝန္တံ မဟာဇုတိံ၊

ပသန္နစိတ္တော သုမနော၊ ဘေသဇ္ဇမဒဒိံ တဒါ.

၄၁. ‘‘အရောဂေါ အာသိ တေနေဝ၊ သမဏော သံဝုတိန္ဒြိယော၊

အသောကော နာမ နာမေန၊ ဥပဋ္ဌာကော ဝိပဿိနော.

၄၂. ‘‘ဧကနဝုတိတော ကပ္ပေ၊ ယံ ဩသဓမဒါသဟံ၊

ဒုဂ္ဂတိံ နာဘိဇာနာမိ၊ ဘေသဇ္ဇဿ ဣဒံ ဖလံ.

၄၃. ‘‘ဣတော စ အဋ္ဌမေ ကပ္ပေ၊ သဗ္ဗောသဓသနာမကော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၄၄. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ တိကိစ္ဆကော ထေရော ဣမာ ဂါထာယော အဘာသိတ္ထာတိ.

တိကိစ္ဆကတ္ထေရဿာပဒါနံ နဝမံ.