၉. သမာဒပကတ္ထေရအပဒါနံ

၄၄. ‘‘နဂရေ ဗန္ဓုမတိယာ၊ မဟာပူဂဂဏော အဟု၊

တေသာဟံ ပဝရော အာသိံ၊ မမ ဗဒ္ဓစရာ [ပဋ္ဌစရာ (သျာ.)] စ တေ.

၄၅. ‘‘သဗ္ဗေ တေ သန္နိပါတေတွာ၊ ပုညကမ္မေ သမာဒယိံ၊

မာဠံ ကဿာမ သံဃဿ၊ ပုညက္ခေတ္တံ အနုတ္တရံ.

၄၆. ‘‘သာဓူတိ တေ ပဋိဿုတွာ၊ မမ ဆန္ဒဝသာနုဂါ၊

နိဋ္ဌာပေတွာ စ တံ မာဠံ၊ ဝိပဿိဿ အဒမှသေ.

၄၇. ‘‘ဧကနဝုတိတော ကပ္ပေ၊ ယံ မာဠမဒဒိံ တဒါ၊

ဒုဂ္ဂတိံ နာဘိဇာနာမိ၊ မာဠဒါနဿိဒံ ဖလံ.

၄၈. ‘‘ဧကူနသတ္တတိကပ္ပေ [ဧကူနသဋ္ဌိကပ္ပမှိ (သီ. သျာ.)]၊

ဧကော အာသိ ဇနာဓိပေါ.

အာဒေယျော နာမ နာမေန၊ စက္ကဝတ္တီ မဟဗ္ဗလော.

၄၉. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သမာဒပကော ထေရော ဣမာ ဂါထာယော အဘာသိတ္ထာတိ.

သမာဒပကတ္ထေရဿာပဒါနံ နဝမံ.