၁၀. ပဉ္စင်္ဂုလိယတ္ထေရအပဒါနံ

၅၀. ‘‘တိဿော နာမာသိ ဘဂဝါ၊ လောကဇေဋ္ဌော နရာသဘော၊

ပဝိသတိ ဂန္ဓကုဋိံ၊ ဝိဟာရကုသလော မုနိ.

၅၁. ‘‘သုဂန္ဓမာလမာဒါယ၊ အဂမာသိံ ဇိနန္တိကံ၊

အပသဒ္ဒေါ စ သမ္ဗုဒ္ဓေ၊ ပဉ္စင်္ဂုလိမဒါသဟံ.

၅၂. ‘‘ဒွေနဝုတေ ဣတော ကပ္ပေ၊ ယံ ဂန္ဓမဘိရောပယိံ၊

ဒုဂ္ဂတိံ နာဘိဇာနာမိ၊ ပဉ္စင်္ဂုလိဿိဒံ [ပဉ္စင်္ဂုလိယိဒံ (သီ.)] ဖလံ.

၅၃. ‘‘ဒွေသတ္တတိမှိတော ကပ္ပေ၊ ရာဇာ အာသိံ သယမ္ပဘော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၅၄. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပဉ္စင်္ဂုလိယော ထေရော ဣမာ ဂါထာယော အဘာသိတ္ထာတိ၊

ပဉ္စင်္ဂုလိယတ္ထေရဿာပဒါနံ ဒသမံ.

သုပါရိစရိယဝဂ္ဂေါ သတ္တရသမော.