၈. ဒုဿဒါယကတ္ထေရအပဒါနံ

၃၈. ‘‘တိဝရာယံ ပုရေ ရမ္မေ၊ ရာဇပုတ္တောသဟံ [ရာဇပုတ္တော အဟံ (သီ. သျာ.)] တဒါ၊

ပဏ္ဏာကာရံ လဘိတွာန၊ ဥပသန္တဿဒါသဟံ.

၃၉. ‘‘အဓိဝါသေသိ ဘဂဝါ၊ ဝတ္ထံ [နဝံ (က.)] ဟတ္ထေန အာမသိ၊

သိဒ္ဓတ္ထော အဓိဝါသေတွာ၊ ဝေဟာသံ နဘမုဂ္ဂမိ.

၄၀. ‘‘ဗုဒ္ဓဿ ဂစ္ဆမာနဿ၊ ဒုဿာ ဓာဝန္တိ ပစ္ဆတော၊

တတ္ထ စိတ္တံ ပသာဒေသိံ၊ ဗုဒ္ဓေါ နော အဂ္ဂပုဂ္ဂလော.

၄၁. ‘‘စတုန္နဝုတိတော ကပ္ပေ၊ ယံ ဒုဿမဒဒိံ တဒါ၊

ဒုဂ္ဂတိံ နာဘိဇာနာမိ၊ ဒုဿဒါနဿိဒံ ဖလံ.

၄၂. ‘‘သတ္တသဋ္ဌိမှိတော ကပ္ပေ၊ စက္ကဝတ္တီ တဒါ အဟု၊

ပရိသုဒ္ဓေါတိ နာမေန၊ မနုဇိန္ဒော မဟဗ္ဗလော.

၄၃. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဒုဿဒါယကော ထေရော ဣမာ ဂါထာယော အဘာသိတ္ထာတိ.

ဒုဿဒါယကတ္ထေရဿာပဒါနံ အဋ္ဌမံ.