၇. ယူထိကပုပ္ဖိယတ္ထေရအပဒါနံ

၃၃. ‘‘စန္ဒဘာဂါနဒီတီရေ၊ အနုသောတံ ဝဇာမဟံ၊

သယမ္ဘုံ အဒ္ဒသံ တတ္ထ၊ သာလရာဇံဝ ဖုလ္လိတံ.

၃၄. ‘‘ပုပ္ဖံ ယူထိကမာဒါယ၊ ဥပဂစ္ဆိံ မဟာမုနိံ၊

ပသန္နစိတ္တော သုမနော၊ ဗုဒ္ဓဿ အဘိရောပယိံ.

၃၅. ‘‘စတုန္နဝုတိတော ကပ္ပေ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၃၆. ‘‘သတ္တသဋ္ဌိမှိတော ကပ္ပေ၊ ဧကော သာမုဒ္ဓရော အဟု၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၃၇. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ယူထိကပုပ္ဖိယော ထေရော ဣမာ ဂါထာယော အဘာသိတ္ထာတိ.

ယူထိကပုပ္ဖိယတ္ထေရဿာပဒါနံ သတ္တမံ.