၆. သပ္ပိဒါယကတ္ထေရအပဒါနံ

၂၈. ‘‘ဖုဿော နာမာသိ [နာမာထ (သီ.)] ဘဂဝါ၊ အာဟုတီနံ ပဋိဂ္ဂဟော၊

ဂစ္ဆတေ ဝီထိယံ ဝီရော၊ နိဗ္ဗာပေန္တော မဟာဇနံ.

၂၉. ‘‘အနုပုဗ္ဗေန ဘဂဝါ၊ အာဂစ္ဆိ မမ သန္တိကံ၊

တတော တံ [တတောဟံ (သီ. သျာ.)] ပတ္တံ ပဂ္ဂယှ၊ သပ္ပိတေလမဒါသဟံ.

၃၀. ‘‘ဒွေနဝုတေ ဣတော ကပ္ပေ၊ ယံ သပ္ပိမဒဒိံ တဒါ၊

ဒုဂ္ဂတိံ နာဘိဇာနာမိ၊ သပ္ပိဒါနဿိဒံ ဖလံ.

၃၁. ‘‘ဆပ္ပညာသေ ဣတော ကပ္ပေ၊ ဧကော အာသိ သမောဒကော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၃၂. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သပ္ပိဒါယကော ထေရော ဣမာ ဂါထာယော အဘာသိတ္ထာတိ.

သပ္ပိဒါယကတ္ထေရဿာပဒါနံ ဆဋ္ဌံ.