၂. ကဏဝေရပုပ္ဖိယတ္ထေရအပဒါနံ

၇. ‘‘သိဒ္ဓတ္ထော နာမ ဘဂဝါ၊ လောကဇေဋ္ဌော နရာသဘော၊

ပုရက္ခတော သာဝကေဟိ၊ နဂရံ ပဋိပဇ္ဇထ.

၈. ‘‘ရညော အန္တေပုရေ အာသိံ၊ ဂေါပကော အဘိသမ္မတော၊

ပါသာဒေ ဥပဝိဋ္ဌောဟံ၊ အဒ္ဒသံ လောကနာယကံ.

၉. ‘‘ကဏဝေရံ [ကရဝီရံ (သက္ကတာနုလောမံ)၊ ကဏဝီရံ (ပါကတ)] ဂဟေတွာန၊ ဘိက္ခုသံဃေ သမောကိရိံ၊

ဗုဒ္ဓဿ ဝိသုံ ကတွာန၊ တတော ဘိယျော သမောကိရိံ.

၁၀. ‘‘စတုန္နဝုတိတော ကပ္ပေ၊ ယံ ပုပ္ဖမဘိပူဇယိံ [ရောပယိံ (သျာ.)]၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၁၁. ‘‘သတ္တာသီတိမှိတော ကပ္ပေ၊ စတုရာသုံ မဟိဒ္ဓိကာ၊

သတ္တရတနသမ္ပန္နာ၊ စက္ကဝတ္တီ မဟဗ္ဗလာ.

၁၂. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ကဏဝေရပုပ္ဖိယော ထေရော ဣမာ ဂါထာယော အဘာသိတ္ထာတိ.

ကဏဝေရပုပ္ဖိယတ္ထေရဿာပဒါနံ ဒုတိယံ.