၃. ခဇ္ဇကဒါယကတ္ထေရအပဒါနံ

၁၃. ‘‘တိဿဿ ခေါ ဘဂဝတော၊ ပုဗ္ဗေ ဖလမဒါသဟံ၊

နာဠိကေရဉ္စ ပါဒါသိံ၊ ခဇ္ဇကံ အဘိသမ္မတံ.

၁၄. ‘‘ဗုဒ္ဓဿ တမဟံ ဒတွာ၊ တိဿဿ တု မဟေသိနော၊

မောဒါမဟံ ကာမကာမီ၊ ဥပပဇ္ဇိံ [ကာမကာရီ၊ ဥပပဇ္ဇံ (သီ.)] ယမိစ္ဆကံ [သဗ္ဗတ္ထပိ ဧဝမေဝ ဒိဿတိ].

၁၅. ‘‘ဒွေနဝုတေ ဣတော ကပ္ပေ၊ ယံ ဒါနမဒဒိံ တဒါ၊

ဒုဂ္ဂတိံ နာဘိဇာနာမိ၊ ဖလဒါနဿိဒံ ဖလံ.

၁၆. ‘‘ဣတော တေရသကပ္ပမှိ၊ ရာဇာ ဣန္ဒသမော အဟု၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၁၇. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ခဇ္ဇကဒါယကော ထေရော ဣမာ ဂါထာယော အဘာသိတ္ထာတိ.

ခဇ္ဇကဒါယကတ္ထေရဿာပဒါနံ တတိယံ.