၁. သုပါရိစရိယတ္ထေရအပဒါနံ

၁. ‘‘ပဒုမော နာမ နာမေန၊ ဒွိပဒိန္ဒော နရာသဘော၊

ပဝနာ အဘိနိက္ခမ္မ၊ ဓမ္မံ ဒေသေတိ စက္ခုမာ.

၂. ‘‘ယက္ခာနံ သမယော အာသိ၊ အဝိဒူရေ မဟေသိနော၊

ယေန ကိစ္စေန သမ္ပတ္တာ၊ အဇ္ဈာပေက္ခိံသု တာဝဒေ.

၃. ‘‘ဗုဒ္ဓဿ ဂိရမညာယ၊ အမတဿ စ ဒေသနံ၊

ပသန္နစိတ္တော သုမနော၊ အပ္ဖေါဋေတွာ ဥပဋ္ဌဟိံ.

၄. ‘‘သုစိဏ္ဏဿ ဖလံ ပဿ၊ ဥပဋ္ဌာနဿ သတ္ထုနော၊

တိံသကပ္ပသဟဿေသု၊ ဒုဂ္ဂတိံ နုပပဇ္ဇဟံ.

၅. ‘‘ဦနတိံသေ ကပ္ပသတေ၊ သမလင်္ကတနာမကော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၆. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သုပါရိစရိယော ထေရော ဣမာ ဂါထာယော အဘာသိတ္ထာတိ.

သုပါရိစရိယတ္ထေရဿာပဒါနံ ပဌမံ.