၉. ဝဋံသကိယတ္ထေရအပဒါနံ

၄၃. ‘‘သုမေဓော နာမ နာမေန၊ သယမ္ဘူ အပရာဇိတော၊

ဝိဝေကမနုဗြူဟန္တော၊ အဇ္ဈောဂဟိ မဟာဝနံ.

၄၄. ‘‘သဠလံ ပုပ္ဖိတံ ဒိသွာ၊ ဂန္ထိတွာန [ဗန္ဓိတွာန (သီ.)] ဝဋံသကံ၊

ဗုဒ္ဓဿ အဘိရောပေသိံ၊ သမ္မုခါ လောကနာယကံ.

၄၅. ‘‘တိံသကပ္ပသဟဿမှိ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ ဗုဒ္ဓပူဇာယိဒံ ဖလံ.

၄၆. ‘‘ဦနဝီသေ ကပ္ပသတေ၊ သောဠသာသုံ သုနိမ္မိတာ၊

သတ္တရတနသမ္ပန္နာ၊ စက္ကဝတ္တီ မဟဗ္ဗလာ.

၄၇. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဝဋံသကိယော ထေရော ဣမာ ဂါထာယော အဘာသိတ္ထာတိ.

ဝဋံသကိယတ္ထေရဿာပဒါနံ နဝမံ.