၁၀. ပလ္လင်္ကဒါယကတ္ထေရအပဒါနံ

၄၈. ‘‘သုမေဓဿ ဘဂဝတော၊ လောကဇေဋ္ဌဿ တာဒိနော၊

ပလ္လင်္ကော ဟိ မယာ ဒိန္နော၊ သဥတ္တရသပစ္ဆဒေါ.

၄၉. ‘‘သတ္တရတနသမ္ပန္နော၊ ပလ္လင်္ကော အာသိ သော တဒါ၊

မမ သင်္ကပ္ပမညာယ၊ နိဗ္ဗတ္တတိ သဒါ မမ.

၅၀. ‘‘တိံသကပ္ပသဟဿမှိ၊ ပလ္လင်္ကမဒဒိံ တဒါ၊

ဒုဂ္ဂတိံ နာဘိဇာနာမိ၊ ပလ္လင်္ကဿ ဣဒံ ဖလံ.

၅၁. ‘‘ဝီသကပ္ပသဟဿမှိ၊ သုဝဏ္ဏာဘာ တယော ဇနာ၊

သတ္တရတနသမ္ပန္နာ၊ စက္ကဝတ္တီ မဟဗ္ဗလာ.

၅၂. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ပလ္လင်္ကဒါယကော ထေရော ဣမာ ဂါထာယော အဘာသိတ္ထာတိ.

ပလ္လင်္ကဒါယကတ္ထေရဿာပဒါနံ ဒသမံ.

ဆတ္တဝဂ္ဂေါ ပန္နရသမော.