၈. ဖလကဒါယကတ္ထေရအပဒါနံ

၃၇. ‘‘ယာနကာရော ပုရေ အာသိံ၊ ဒါရုကမ္မေ သုသိက္ခိတော၊

စန္ဒနံ ဖလကံ ကတွာ၊ အဒါသိံ လောကဗန္ဓုနော.

၃၈. ‘‘ပဘာသတိ ဣဒံ ဗျမှံ၊ သုဝဏ္ဏဿ သုနိမ္မိတံ၊

ဟတ္ထိယာနံ အဿယာနံ၊ ဒိဗ္ဗယာနံ ဥပဋ္ဌိတံ.

၃၉. ‘‘ပါသာဒါ သိဝိကာ စေဝ၊ နိဗ္ဗတ္တန္တိ ယဒိစ္ဆကံ၊

အက္ခုဗ္ဘံ [အက္ခောဘံ (သီ.)] ရတနံ မယှံ၊ ဖလကဿ ဣဒံ ဖလံ.

၄၀. ‘‘ဧကနဝုတိတော ကပ္ပေ၊ ဖလကံ ယမဟံ ဒဒိံ၊

ဒုဂ္ဂတိံ နာဘိဇာနာမိ၊ ဖလကဿ ဣဒံ ဖလံ.

၄၁. ‘‘သတ္တပညာသကပ္ပမှိ၊ စတုရော နိမ္မိတာဝှယာ၊

သတ္တရတနသမ္ပန္နာ၊ စက္ကဝတ္တီ မဟဗ္ဗလာ.

၄၂. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဖလကဒါယကော ထေရော ဣမာ ဂါထာယော အဘာသိတ္ထာတိ.

ဖလကဒါယကတ္ထေရဿာပဒါနံ အဋ္ဌမံ.