၅. ဥမာပုပ္ဖိယတ္ထေရအပဒါနံ

၂၁. ‘‘နိဗ္ဗုတေ လောကမဟိတေ [လောကနာထမှိ (သီ.)]၊ အာဟုတီနံ ပဋိဂ္ဂဟေ၊

သိဒ္ဓတ္ထမှိ ဘဂဝတိ၊ မဟာထူပမဟော အဟု.

၂၂. ‘‘မဟေ ပဝတ္တမာနမှိ၊ သိဒ္ဓတ္ထဿ မဟေသိနော၊

ဥမာပုပ္ဖံ [ဥမ္မာပုပ္ဖံ (သဗ္ဗတ္ထ)] ဂဟေတွာန၊ ထူပမှိ အဘိရောပယိံ.

၂၃. ‘‘စတုန္နဝုတိတော ကပ္ပေ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ ထူပပူဇာယိဒံ [ပုပ္ဖပူဇာယိဒံ (သျာ.)၊ ဗုဒ္ဓပူဇာယိဒံ (က.)] ဖလံ.

၂၄. ‘‘ဣတော စ နဝမေ ကပ္ပေ၊ သောမဒေဝသနာမကာ၊

ပဉ္စာသီတိသု ရာဇာနော၊ စက္ကဝတ္တီ မဟဗ္ဗလာ.

၂၅. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဥမာပုပ္ဖိယော ထေရော ဣမာ ဂါထာယော အဘာသိတ္ထာတိ.

ဥမာပုပ္ဖိယတ္ထေရဿာပဒါနံ ပဉ္စမံ.