၆. အနုလေပဒါယကတ္ထေရအပဒါနံ

၂၆. ‘‘အနောမဒဿီမုနိနော၊ ဗောဓိဝေဒိမကာသဟံ၊

သုဓာယ ပိဏ္ဍံ ဒတွာန၊ ပါဏိကမ္မံ အကာသဟံ.

၂၇. ‘‘ဒိသွာ တံ သုကတံ ကမ္မံ၊ အနောမဒဿီ နရုတ္တမော၊

ဘိက္ခုသံဃေ ဌိတော သတ္ထာ၊ ဣမံ ဂါထံ အဘာသထ.

၂၈. ‘‘‘ဣမိနာ သုဓကမ္မေန၊ စေတနာပဏိဓီဟိ စ၊

သမ္ပတ္တိံ အနုဘောတွာန၊ ဒုက္ခဿန္တံ ကရိဿတိ’.

၂၉. ‘‘ပသန္နမုခဝဏ္ဏောမှိ၊ ဧကဂ္ဂေါ သုသမာဟိတော၊

ဓာရေမိ အန္တိမံ ဒေဟံ၊ သမ္မာသမ္ဗုဒ္ဓသာသနေ.

၃၀. ‘‘ဣတော ကပ္ပသတေ အာသိံ၊ ပရိပုဏ္ဏေ အနူနကေ [ပရိပုဏ္ဏော အနူနကော (သျာ.)]၊

ရာဇာ သဗ္ဗဃနော နာမ၊ စက္ကဝတ္တီ မဟဗ္ဗလော.

၃၁. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အနုလေပဒါယကော ထေရော ဣမာ ဂါထာယော အဘာသိတ္ထာတိ.

အနုလေပဒါယကတ္ထေရဿာပဒါနံ ဆဋ္ဌံ.