၂. ထမ္ဘာရောပကတ္ထေရအပဒါနံ

၅. ‘‘နိဗ္ဗုတေ လောကနာထမှိ၊ ဓမ္မဒဿီနရာသဘေ၊

အာရောပေသိံ ဓဇတ္ထမ္ဘံ၊ ဗုဒ္ဓသေဋ္ဌဿ စေတိယေ.

၆. ‘‘နိဿေဏိံ မာပယိတွာန၊ ထူပသေဋ္ဌံ သမာရုဟိံ၊

ဇာတိပုပ္ဖံ ဂဟေတွာန၊ ထူပမှိ အဘိရောပယိံ.

၇. ‘‘အဟော ဗုဒ္ဓေါ အဟော ဓမ္မော၊ အဟော နော သတ္ထု သမ္ပဒါ၊

ဒုဂ္ဂတိံ နာဘိဇာနာမိ၊ ထူပပူဇာယိဒံ ဖလံ.

၈. ‘‘စတုန္နဝုတိတော ကပ္ပေ၊ ထူပသီခသနာမကာ၊

သောဠသာသိံသု ရာဇာနော၊ စက္ကဝတ္တီ မဟဗ္ဗလာ.

၉. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ထမ္ဘာရောပကော ထေရော ဣမာ ဂါထာယော အဘာသိတ္ထာတိ.

ထမ္ဘာရောပကတ္ထေရဿာပဒါနံ ဒုတိယံ.