၁. အတိဆတ္တိယတ္ထေရအပဒါနံ

၁. ‘‘ပရိနိဗ္ဗုတေ ဘဂဝတိ၊ အတ္ထဒဿီနရုတ္တမေ၊

ဆတ္တာတိဆတ္တံ [ဆတ္တာဓိဆတ္တံ (သီ.)] ကာရေတွာ၊ ထူပမှိ အဘိရောပယိံ.

၂. ‘‘ကာလေန ကာလမာဂန္တွာ၊ နမဿိံ လောကနာယကံ [သတ္ထု စေတိယံ (သီ.)]၊

ပုပ္ဖစ္ဆဒနံ ကတွာန၊ ဆတ္တမှိ အဘိရောပယိံ.

၃. ‘‘သတ္တရသေ ကပ္ပသတေ၊ ဒေဝရဇ္ဇမကာရယိံ၊

မနုဿတ္တံ န ဂစ္ဆာမိ၊ ထူပပူဇာယိဒံ ဖလံ.

၄. ‘‘ပဋိသမ္ဘိဒါ စတဿော၊ ဝိမောက္ခာပိ စ အဋ္ဌိမေ၊

ဆဠဘိညာ သစ္ဆိကတာ၊ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အတိဆတ္တိယော [အဓိဆတ္တိယော (သီ. သျာ.)] ထေရော ဣမာ ဂါထာယော အဘာသိတ္ထာတိ.

အတိဆတ္တိယတ္ထေရဿာပဒါနံ ပဌမံ.