၈. ဧကပသာဒနိယတ္ထေရအပဒါနံ

၅၅. ‘‘နာရဒေါ ဣတိ မေ နာမံ [နာရဒေါ ဣတိ နာမေန (သျာ. က.) ဥပရိ တေဝီသတိမဝဂ္ဂေ ပန ဆဋ္ဌာပဒါနေ ‘‘မေ နာမံ‘‘ဣစ္စေဝ ဒိဿတိ]၊ ကေသဝေါ ဣတိ မံ ဝိဒူ၊

ကုသလာကုသလံ ဧသံ၊ အဂမံ ဗုဒ္ဓသန္တိကံ.

၅၆. ‘‘မေတ္တစိတ္တော ကာရုဏိကော၊ အတ္ထဒဿီ မဟာမုနိ၊

အဿာသယန္တော သတ္တေ သော၊ ဓမ္မံ ဒေသေတိ စက္ခုမာ.

၅၇. ‘‘သကံ စိတ္တံ ပသာဒေတွာ၊ သိရေ ကတွာန အဉ္ဇလိံ၊

သတ္ထာရံ အဘိဝါဒေတွာ၊ ပက္ကာမိံ ပါစိနာမုခေါ.

၅၈. ‘‘သတ္တရသေ ကပ္ပသတေ၊ ရာဇာ အာသိ မဟီပတိ၊

အမိတ္တတာပနော နာမ၊ စက္ကဝတ္တီ မဟဗ္ဗလော.

၅၉. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဧကပသာဒနိယော ထေရော ဣမာ ဂါထာယော အဘာသိတ္ထာတိ.

ဧကပသာဒနိယတ္ထေရဿာပဒါနံ အဋ္ဌမံ.