၉. သာလပုပ္ဖဒါယကတ္ထေရအပဒါနံ

၆၀. ‘‘မိဂရာဇာ တဒါ အာသိံ၊ အဘိဇာတော သုကေသရီ၊

ဂိရိဒုဂ္ဂံ ဂဝေသန္တော၊ အဒ္ဒသံ လောကနာယကံ.

၆၁. ‘‘အယံ နု ခေါ မဟာဝီရော၊ နိဗ္ဗာပေတိ မဟာဇနံ၊

ယံနူနာဟံ ဥပါသေယျံ၊ ဒေဝဒေဝံ နရာသဘံ.

၆၂. ‘‘သာခံ သာလဿ ဘဉ္ဇိတွာ၊ သကောသံ ပုပ္ဖမာဟရိံ၊

ဥပဂန္တွာန သမ္ဗုဒ္ဓံ၊ အဒါသိံ ပုပ္ဖမုတ္တမံ.

၆၃. ‘‘ဧကနဝုတိတော ကပ္ပေ၊ ယံ ပုပ္ဖမဘိရောပယိံ၊

ဒုဂ္ဂတိံ နာဘိဇာနာမိ၊ ပုပ္ဖဒါနဿိဒံ ဖလံ.

၆၄. ‘‘ဣတော စ နဝမေ ကပ္ပေ၊ ဝိရောစနသနာမကာ၊

တယော အာသိံသု ရာဇာနော၊ စက္ကဝတ္တီ မဟဗ္ဗလာ.

၆၅. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သာလပုပ္ဖဒါယကော ထေရော ဣမာ ဂါထာယော အဘာသိတ္ထာတိ.

သာလပုပ္ဖဒါယကတ္ထေရဿာပဒါနံ နဝမံ.