၇. အတ္ထသန္ဒဿကတ္ထေရအပဒါနံ

၄၇. ‘‘ဝိသာလမာဠေ အာသီနော၊ အဒ္ဒသံ လောကနာယကံ၊

ခီဏာသဝံ ဗလပ္ပတ္တံ၊ ဘိက္ခုသံဃပုရက္ခတံ.

၄၈. ‘‘သတသဟဿာ တေဝိဇ္ဇာ၊ ဆဠဘိညာ မဟိဒ္ဓိကာ၊

ပရိဝါရေန္တိ သမ္ဗုဒ္ဓံ၊ ကော ဒိသွာ နပ္ပသီဒတိ.

၄၉. ‘‘ဉာဏေ ဥပနိဓာ ယဿ၊ န ဝိဇ္ဇတိ သဒေဝကေ၊

အနန္တဉာဏံ သမ္ဗုဒ္ဓံ၊ ကော ဒိသွာ နပ္ပသီဒတိ.

၅၀. ‘‘ဓမ္မကာယဉ္စ ဒီပေန္တံ၊ ကေဝလံ ရတနာကရံ၊

ဝိကပ္ပေတုံ [ဝိကောပေတုံ (သီ. သျာ.)] န သက္ကောန္တိ၊ ကော ဒိသွာ နပ္ပသီဒတိ.

၅၁. ‘‘ဣမာဟိ တီဟိ ဂါထာဟိ၊ နာရဒေါဝှယဝစ္ဆလော [သရဂစ္ဆိယော (သီ.)၊ ပုရဂစ္ဆိယော (သျာ.)]၊

ပဒုမုတ္တရံ ထဝိတွာန၊ သမ္ဗုဒ္ဓံ အပရာဇိတံ.

၅၂. ‘‘တေန စိတ္တပ္ပသာဒေန၊ ဗုဒ္ဓသန္ထဝနေန စ၊

ကပ္ပါနံ သတသဟဿံ၊ ဒုဂ္ဂတိံ၊ နုပပဇ္ဇဟံ.

၅၃. ‘‘ဣတော တိံသကပ္ပသတေ၊ သုမိတ္တော နာမ ခတ္တိယော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၅၄. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ အတ္ထသန္ဒဿကော ထေရော ဣမာ ဂါထာယော အဘာသိတ္ထာတိ.

အတ္ထသန္ဒဿကတ္ထေရဿာပဒါနံ သတ္တမံ.