၉. ဝေယျာဝစ္စကတ္ထေရအပဒါနံ

၅၁. ‘‘ဝိပဿိဿ ဘဂဝတော၊ မဟာပူဂဂဏော အဟု၊

ဝေယျာဝစ္စကရော အာသိံ၊ သဗ္ဗကိစ္စေသု ဝါဝဋော [ဗျာဝဋော (သီ. သျာ.)].

၅၂. ‘‘ဒေယျဓမ္မော စ မေ နတ္ထိ၊ သုဂတဿ မဟေသိနော၊

အဝန္ဒိံ သတ္ထုနော ပါဒေ၊ ဝိပ္ပသန္နေန စေတသာ.

၅၃. ‘‘ဧကနဝုတိတော ကပ္ပေ၊ ဝေယျာဝစ္စံ အကာသဟံ၊

ဒုဂ္ဂတိံ နာဘိဇာနာမိ၊ ဝေယျာဝစ္စဿိဒံ ဖလံ.

၅၄. ‘‘ဣတော စ အဋ္ဌမေ ကပ္ပေ၊ ရာဇာ အာသိံ သုစိန္တိတော၊

သတ္တရတနသမ္ပန္နော၊ စက္ကဝတ္တီ မဟဗ္ဗလော.

၅၅. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဝေယျာဝစ္စကော ထေရော ဣမာ ဂါထာယော အဘာသိတ္ထာတိ.

ဝေယျာဝစ္စကတ္ထေရဿာပဒါနံ နဝမံ.