၁၀. ဗုဒ္ဓုပဋ္ဌာကတ္ထေရအပဒါနံ

၅၆. ‘‘ဝိပဿိဿ ဘဂဝတော၊ အဟောသိံ သင်္ခဓမ္မကော၊

နိစ္စုပဋ္ဌာနယုတ္တောမှိ၊ သုဂတဿ မဟေသိနော.

၅၇. ‘‘ဥပဋ္ဌာနဖလံ ပဿ၊ လောကနာထဿ တာဒိနော၊

သဋ္ဌိတူရိယသဟဿာနိ၊ ပရိဝါရေန္တိ မံ သဒါ.

၅၈. ‘‘ဧကနဝုတိတော ကပ္ပေ၊ ဥပဋ္ဌဟိံ မဟာဣသိံ၊

ဒုဂ္ဂတိံ နာဘိဇာနာမိ၊ ဥပဋ္ဌာနဿိဒံ ဖလံ.

၅၉. ‘‘စတုဝီသေ [စတုနဝုတေ (သျာ.)] ဣတော ကပ္ပေ၊ မဟာနိဂ္ဃေါသနာမကာ၊

သောဠသာသိံသု ရာဇာနော၊ စက္ကဝတ္တီ မဟဗ္ဗလာ.

၆၀. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ ဗုဒ္ဓုပဋ္ဌာကော ထေရော ဣမာ ဂါထာယော အဘာသိတ္ထာတိ.

ဗုဒ္ဓုပဋ္ဌာကတ္ထေရဿာပဒါနံ ဒသမံ.

သုဓာဝဂ္ဂေါ ဒသမော.

တဿုဒ္ဒါနံ –

သုဓာ သုစိန္တိ စေဠဉ္စ၊ သူစီ စ ဂန္ဓမာလိယော၊

တိပုပ္ဖိယော မဓုသေနာ၊ ဝေယျာဝစ္စော စုပဋ္ဌကော၊

သမသဋ္ဌိ စ ဂါထာယော၊ အသ္မိံ ဝဂ္ဂေ ပကိတ္တိတာ.

အထ ဝဂ္ဂုဒ္ဒါနံ –

ဗုဒ္ဓဝဂ္ဂေါ ဟိ ပဌမော၊ သီဟာသနိ သုဘူတိ စ၊

ကုဏ္ဍဓာနော ဥပါလိ စ၊ ဗီဇနိသကစိန္တိ စ.

နာဂသမာလော တိမိရော၊ သုဓာဝဂ္ဂေန တေ ဒသ၊

စတုဒ္ဒသသတာ ဂါထာ၊ ပဉ္စပညာသမေဝ စ.

ဗုဒ္ဓဝဂ္ဂဒသကံ.