၈. သေနာသနဒါယကတ္ထေရအပဒါနံ

၄၅. ‘‘သိဒ္ဓတ္ထဿ ဘဂဝတော၊ အဒါသိံ ပဏ္ဏသန္ထရံ၊

သမန္တာ ဥပဟာရဉ္စ၊ ကုသုမံ ဩကိရိံ အဟံ.

၄၆. ‘‘ပါသာဒေဝံ ဂုဏံ ရမ္မံ [ပါသာဒေ စ ဂုဟံ ရမ္မံ (သျာ.)]၊ အနုဘောမိ မဟာရဟံ၊

မဟဂ္ဃါနိ စ ပုပ္ဖါနိ၊ သယနေဘိသဝန္တိ မေ.

၄၇. ‘‘သယနေဟံ တုဝဋ္ဋာမိ၊ ဝိစိတ္တေ ပုပ္ဖသန္ထတေ၊

ပုပ္ဖဝုဋ္ဌိ စ သယနေ၊ အဘိဝဿတိ တာဝဒေ.

၄၈. ‘‘စတုန္နဝုတိတော ကပ္ပေ၊ အဒါသိံ ပဏ္ဏသန္ထရံ၊

ဒုဂ္ဂတိံ နာဘိဇာနာမိ၊ သန္ထရဿ ဣဒံ ဖလံ.

၄၉. ‘‘တိဏသန္ထရကာ နာမ၊ သတ္တေတေ စက္ကဝတ္တိနော၊

ဣတော တေ ပဉ္စမေ ကပ္ပေ၊ ဥပ္ပဇ္ဇိံသု ဇနာဓိပါ.

၅၀. ‘‘ပဋိသမ္ဘိဒါ စတဿော။ပေ။ ကတံ ဗုဒ္ဓဿ သာသနံ’’.

ဣတ္ထံ သုဒံ အာယသ္မာ သေနာသနဒါယကော ထေရော ဣမာ ဂါထာယော အဘာသိတ္ထာတိ.

သေနာသနဒါယကတ္ထေရဿာပဒါနံ အဋ္ဌမံ.