(၂၃) ဥဏှီသသီသလက္ခဏံ

၂၃၀. ‘‘ယမ္ပိ၊ ဘိက္ခဝေ၊ တထာဂတော ပုရိမံ ဇာတိံ ပုရိမံ ဘဝံ ပုရိမံ နိကေတံ ပုဗ္ဗေ မနုဿဘူတော သမာနော ဗဟုဇနပုဗ္ဗင်္ဂမော အဟောသိ ကုသလေသု ဓမ္မေသု ဗဟုဇနပါမောက္ခော ကာယသုစရိတေ ဝစီသုစရိတေ မနောသုစရိတေ ဒါနသံဝိဘာဂေ သီလသမာဒါနေ ဥပေါသထုပဝါသေ မတ္တေယျတာယ ပေတ္တေယျတာယ သာမညတာယ ဗြဟ္မညတာယ ကုလေ ဇေဋ္ဌာပစာယိတာယ အညတရညတရေသု စ အဓိကုသလေသု ဓမ္မေသု. သော တဿ ကမ္မဿ ကဋတ္တာ။ပေ။ သော တတော စုတော ဣတ္ထတ္တံ အာဂတော သမာနော ဣမံ မဟာပုရိသလက္ခဏံ ပဋိလဘတိ – ဥဏှီသသီသော ဟောတိ.

‘‘သော တေန လက္ခဏေန သမန္နာဂတော သစေ အဂါရံ အဇ္ဈာဝသတိ၊ ရာဇာ ဟောတိ စက္ကဝတ္တီ။ပေ။ ရာဇာ သမာနော ကိံ လဘတိ? မဟာဿ ဇနော အနွာယိကော ဟောတိ၊ ဗြာဟ္မဏဂဟပတိကာ နေဂမဇာနပဒါ ဂဏကမဟာမတ္တာ အနီကဋ္ဌာ ဒေါဝါရိကာ အမစ္စာ ပါရိသဇ္ဇာ ရာဇာနော ဘောဂိယာ ကုမာရာ. ရာဇာ သမာနော ဣဒံ လဘတိ။ ဗုဒ္ဓေါ သမာနော ကိံ လဘတိ? မဟာဿ ဇနော အနွာယိကော ဟောတိ၊ ဘိက္ခူ ဘိက္ခုနိယော ဥပါသကာ ဥပါသိကာယော ဒေဝါ မနုဿာ အသုရာ နာဂါ ဂန္ဓဗ္ဗာ. ဗုဒ္ဓေါ သမာနော ဣဒံ လဘတိ’’. ဧတမတ္ထံ ဘဂဝါ အဝေါစ.

၂၃၁. တတ္ထေတံ ဝုစ္စတိ –

‘‘ပုဗ္ဗင်္ဂမော သုစရိတေသု အဟု၊

ဓမ္မေသု ဓမ္မစရိယာဘိရတော၊

အနွာယိကော ဗဟုဇနဿ အဟု၊

သဂ္ဂေသု ဝေဒယိတ္ထ ပုညဖလံ.

‘‘ဝေဒိတွာ သော သုစရိတဿ ဖလံ၊

ဥဏှီသသီသတ္တမိဓဇ္ဈဂမာ၊

ဗျာကံသု ဗျဉ္ဇနနိမိတ္တဓရာ၊

ပုဗ္ဗင်္ဂမော ဗဟုဇနံ ဟေဿတိ.

‘‘ပဋိဘောဂိယာ မနုဇေသု ဣဓ၊

ပုဗ္ဗေဝ တဿ အဘိဟရန္တိ တဒါ၊

ယဒိ ခတ္တိယော ဘဝတိ ဘူမိပတိ၊

ပဋိဟာရကံ ဗဟုဇနေ လဘတိ.

‘‘အထ စေပိ ပဗ္ဗဇတိ သော မနုဇော၊

ဓမ္မေသု ဟောတိ ပဂုဏော ဝိသဝီ၊

တဿာနုသာသနိဂုဏာဘိရတော၊

အနွာယိကော ဗဟုဇနော ဘဝတီ’’တိ.