(၁၄) ကောသောဟိတဝတ္ထဂုယှလက္ခဏံ

၂၂၀. ယမ္ပိ၊ ဘိက္ခဝေ၊ တထာဂတော ပုရိမံ ဇာတိံ ပုရိမံ ဘဝံ ပုရိမံ နိကေတံ ပုဗ္ဗေ မနုဿဘူတော သမာနော စိရပ္ပနဋ္ဌေ သုစိရပ္ပဝါသိနော ဉာတိမိတ္တေ သုဟဇ္ဇေ သခိနော သမာနေတာ အဟောသိ. မာတရမ္ပိ ပုတ္တေန သမာနေတာ အဟောသိ၊ ပုတ္တမ္ပိ မာတရာ သမာနေတာ အဟောသိ၊ ပိတရမ္ပိ ပုတ္တေန သမာနေတာ အဟောသိ၊ ပုတ္တမ္ပိ ပိတရာ သမာနေတာ အဟောသိ၊ ဘာတရမ္ပိ ဘာတရာ သမာနေတာ အဟောသိ၊ ဘာတရမ္ပိ ဘဂိနိယာ သမာနေတာ အဟောသိ၊ ဘဂိနိမ္ပိ ဘာတရာ သမာနေတာ အဟောသိ၊ ဘဂိနိမ္ပိ ဘဂိနိယာ သမာနေတာ အဟောသိ၊ သမင်္ဂီကတွာ [သမဂ္ဂိံ ကတွာ (သီ. သျာ. ပီ.)] စ အဗ္ဘနုမောဒိတာ အဟောသိ. သော တဿ ကမ္မဿ ကဋတ္တာ။ပေ။ သော တတော စုတော ဣတ္ထတ္တံ အာဂတော သမာနော ဣမံ မဟာပုရိသလက္ခဏံ ပဋိလဘတိ – ကောသောဟိတဝတ္ထဂုယှော ဟောတိ.

‘‘သော တေန လက္ခဏေန သမန္နာဂတော သစေ အဂါရံ အဇ္ဈာဝသတိ၊ ရာဇာ ဟောတိ စက္ကဝတ္တီ။ပေ။ ရာဇာ သမာနော ကိံ လဘတိ? ပဟူတပုတ္တော ဟောတိ၊ ပရောသဟဿံ ခေါ ပနဿ ပုတ္တာ ဘဝန္တိ သူရာ ဝီရင်္ဂရူပါ ပရသေနပ္ပမဒ္ဒနာ. ရာဇာ သမာနော ဣဒံ လဘတိ။ ဗုဒ္ဓေါ သမာနော ကိံ လဘတိ? ပဟူတပုတ္တော ဟောတိ၊ အနေကသဟဿံ ခေါ ပနဿ ပုတ္တာ ဘဝန္တိ သူရာ ဝီရင်္ဂရူပါ ပရသေနပ္ပမဒ္ဒနာ. ဗုဒ္ဓေါ သမာနော ဣဒံ လဘတိ’’. ဧတမတ္ထံ ဘဂဝါ အဝေါစ.

၂၂၁. တတ္ထေတံ ဝုစ္စတိ –

‘‘ပုရေ ပုရတ္ထာ ပုရိမာသု ဇာတိသု၊

စိရပ္ပနဋ္ဌေ သုစိရပ္ပဝါသိနော၊

ဉာတီ သုဟဇ္ဇေ သခိနော သမာနယိ၊

သမင်္ဂိကတွာ အနုမောဒိတာ အဟု.

‘‘သော တေန [သ တေန (က.)] ကမ္မေန ဒိဝံ သမက္ကမိ၊

သုခဉ္စ ခိဍ္ဍာရတိယော စ အနွဘိ၊

တတော စဝိတွာ ပုနရာဂတော ဣဓ၊

ကောသောဟိတံ ဝိန္ဒတိ ဝတ္ထဆာဒိယံ.

‘‘ပဟူတပုတ္တော ဘဝတီ တထာဝိဓော၊

ပရောသဟဿဉ္စ [ပရောသဟဿဿ (သီ. ပီ.)] ဘဝန္တိ အတြဇာ၊

သူရာ စ ဝီရာ စ [သူရာ စ ဝီရင်္ဂရူပါ (က.)] အမိတ္တတာပနာ၊

ဂိဟိဿ ပီတိံဇနနာ ပိယံဝဒါ.

‘‘ဗဟူတရာ ပဗ္ဗဇိတဿ ဣရိယတော၊

ဘဝန္တိ ပုတ္တာ ဝစနာနုသာရိနော၊

ဂိဟိဿ ဝါ ပဗ္ဗဇိတဿ ဝါ ပုန၊

တံ လက္ခဏံ ဇာယတိ တဒတ္ထဇောတက’’န္တိ.

ပဌမဘာဏဝါရော နိဋ္ဌိတော.