အာနန္ဒအစ္ဆရိယဓမ္မော
၂၀၇. အထ ခေါ အာယသ္မာ အာနန္ဒော ဝိဟာရံ ပဝိသိတွာ ကပိသီသံ အာလမ္ဗိတွာ ရောဒမာနော အဋ္ဌာသိ – ‘‘အဟဉ္စ ဝတမှိ သေခေါ သကရဏီယော၊ သတ္ထု စ မေ ပရိနိဗ္ဗာနံ ဘဝိဿတိ၊ ယော မမ အနုကမ္ပကော’’တိ. အထ ခေါ ဘဂဝါ ဘိက္ခူ အာမန္တေသိ – ‘‘ကဟံ နု ခေါ၊ ဘိက္ခဝေ၊ အာနန္ဒော’’တိ? ‘‘ဧသော၊ ဘန္တေ၊ အာယသ္မာ အာနန္ဒော ဝိဟာရံ ပဝိသိတွာ ကပိသီသံ အာလမ္ဗိတွာ ရောဒမာနော ဌိတော – ‘အဟဉ္စ ဝတမှိ သေခေါ သကရဏီယော၊ သတ္ထု စ မေ ပရိနိဗ္ဗာနံ ဘဝိဿတိ၊ ယော မမ အနုကမ္ပကော’’’တိ. အထ ခေါ ဘဂဝါ အညတရံ ဘိက္ခုံ အာမန္တေသိ – ‘‘ဧဟိ တွံ၊ ဘိက္ခု၊ မမ ဝစနေန အာနန္ဒံ အာမန္တေဟိ – ‘သတ္ထာ တံ၊ အာဝုသော အာနန္ဒ၊ အာမန္တေတီ’’’တိ. ‘‘ဧဝံ၊ ဘန္တေ’’တိ ခေါ သော ဘိက္ခု ဘဂဝတော ပဋိဿုတွာ ယေနာယသ္မာ အာနန္ဒော တေနုပသင်္ကမိ၊ ဥပသင်္ကမိတွာ အာယသ္မန္တံ အာနန္ဒံ ဧတဒဝေါစ – ‘‘သတ္ထာ တံ၊ အာဝုသော အာနန္ဒ၊ အာမန္တေတီ’’တိ. ‘‘ဧဝမာဝုသော’’တိ ခေါ အာယသ္မာ အာနန္ဒော တဿ ဘိက္ခုနော ပဋိဿုတွာ ယေန ဘဂဝါ တေနုပသင်္ကမိ၊ ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နံ ခေါ အာယသ္မန္တံ အာနန္ဒံ ဘဂဝါ ဧတဒဝေါစ – ‘‘အလံ၊ အာနန္ဒ၊ မာ သောစိ မာ ပရိဒေဝိ၊ နနု ဧတံ၊ အာနန္ဒ၊ မယာ ပဋိကစ္စေဝ အက္ခာတံ – ‘သဗ္ဗေဟေဝ ပိယေဟိ မနာပေဟိ နာနာဘာဝေါ ဝိနာဘာဝေါ အညထာဘာဝေါ’၊ တံ ကုတေတ္ထ၊ အာနန္ဒ၊ လဗ္ဘာ. ယံ တံ ဇာတံ ဘူတံ သင်္ခတံ ပလောကဓမ္မံ၊ တံ ဝတ တထာဂတဿာပိ သရီရံ မာ ပလုဇ္ဇီ’တိ နေတံ ဌာနံ ဝိဇ္ဇတိ. ဒီဃရတ္တံ ခေါ တေ၊ အာနန္ဒ၊ တထာဂတော ပစ္စုပဋ္ဌိတော မေတ္တေန ကာယကမ္မေန ဟိတေန သုခေန အဒွယေန အပ္ပမာဏေန၊ မေတ္တေန ဝစီကမ္မေန ဟိတေန သုခေန အဒွယေန အပ္ပမာဏေန၊ မေတ္တေန မနောကမ္မေန ဟိတေန သုခေန အဒွယေန အပ္ပမာဏေန. ကတပုညောသိ တွံ၊ အာနန္ဒ၊ ပဓာနမနုယုဉ္ဇ၊ ခိပ္ပံ ဟောဟိသိ အနာသဝေါ’’တိ.
၂၀၈. အထ ခေါ ဘဂဝါ ဘိက္ခူ အာမန္တေသိ – ‘‘ယေပိ တေ၊ ဘိက္ခဝေ၊ အဟေသုံ အတီတမဒ္ဓါနံ အရဟန္တော သမ္မာသမ္ဗုဒ္ဓါ၊ တေသမ္ပိ ဘဂဝန္တာနံ ဧတပ္ပရမာယေဝ ဥပဋ္ဌာကာ အဟေသုံ၊ သေယျထာပိ မယှံ အာနန္ဒော. ယေပိ တေ၊ ဘိက္ခဝေ၊ ဘဝိဿန္တိ အနာဂတမဒ္ဓါနံ အရဟန္တော သမ္မာသမ္ဗုဒ္ဓါ၊ တေသမ္ပိ ဘဂဝန္တာနံ ဧတပ္ပရမာယေဝ ဥပဋ္ဌာကာ ဘဝိဿန္တိ၊ သေယျထာပိ မယှံ အာနန္ဒော. ပဏ္ဍိတော၊ ဘိက္ခဝေ၊ အာနန္ဒော၊ မေဓာဝီ၊ ဘိက္ခဝေ၊ အာနန္ဒော. ဇာနာတိ ‘အယံ ကာလော တထာဂတံ ဒဿနာယ ဥပသင်္ကမိတုံ ဘိက္ခူနံ၊ အယံ ကာလော ဘိက္ခုနီနံ၊ အယံ ကာလော ဥပါသကာနံ၊ အယံ ကာလော ဥပါသိကာနံ၊ အယံ ကာလော ရညော ရာဇမဟာမတ္တာနံ တိတ္ထိယာနံ တိတ္ထိယသာဝကာန’န္တိ.
၂၀၉. ‘‘စတ္တာရောမေ၊ ဘိက္ခဝေ၊ အစ္ဆရိယာ အဗ္ဘုတာ ဓမ္မာ [အဗ္ဘုတဓမ္မာ (သျာ. က.)] အာနန္ဒေ. ကတမေ စတ္တာရော? သစေ၊ ဘိက္ခဝေ၊ ဘိက္ခုပရိသာ အာနန္ဒံ ဒဿနာယ ဥပသင်္ကမတိ၊ ဒဿနေန သာ အတ္တမနာ ဟောတိ. တတြ စေ အာနန္ဒော ဓမ္မံ ဘာသတိ၊ ဘာသိတေနပိ သာ အတ္တမနာ ဟောတိ. အတိတ္တာဝ၊ ဘိက္ခဝေ၊ ဘိက္ခုပရိသာ ဟောတိ၊ အထ ခေါ အာနန္ဒော တုဏှီ ဟောတိ. သစေ၊ ဘိက္ခဝေ၊ ဘိက္ခုနီပရိသာ အာနန္ဒံ ဒဿနာယ ဥပသင်္ကမတိ၊ ဒဿနေန သာ အတ္တမနာ ဟောတိ. တတြ စေ အာနန္ဒော ဓမ္မံ ဘာသတိ၊ ဘာသိတေနပိ သာ အတ္တမနာ ဟောတိ. အတိတ္တာဝ၊ ဘိက္ခဝေ၊ ဘိက္ခုနီပရိသာ ဟောတိ၊ အထ ခေါ အာနန္ဒော တုဏှီ ဟောတိ. သစေ၊ ဘိက္ခဝေ၊ ဥပါသကပရိသာ အာနန္ဒံ ဒဿနာယ ဥပသင်္ကမတိ၊ ဒဿနေန သာ အတ္တမနာ ဟောတိ. တတြ စေ အာနန္ဒော ဓမ္မံ ဘာသတိ၊ ဘာသိတေနပိ သာ အတ္တမနာ ဟောတိ. အတိတ္တာဝ၊ ဘိက္ခဝေ၊ ဥပါသကပရိသာ ဟောတိ၊ အထ ခေါ အာနန္ဒော တုဏှီ ဟောတိ. သစေ၊ ဘိက္ခဝေ၊ ဥပါသိကာပရိသာ အာနန္ဒံ ဒဿနာယ ဥပသင်္ကမတိ၊ ဒဿနေန သာ အတ္တမနာ ဟောတိ. တတြ စေ၊ အာနန္ဒော၊ ဓမ္မံ ဘာသတိ၊ ဘာသိတေနပိ သာ အတ္တမနာ ဟောတိ. အတိတ္တာဝ၊ ဘိက္ခဝေ၊ ဥပါသိကာပရိသာ ဟောတိ၊ အထ ခေါ အာနန္ဒော တုဏှီ ဟောတိ. ဣမေ ခေါ၊ ဘိက္ခဝေ၊ စတ္တာရော အစ္ဆရိယာ အဗ္ဘုတာ ဓမ္မာ အာနန္ဒေ.
‘‘စတ္တာရောမေ၊ ဘိက္ခဝေ၊ အစ္ဆရိယာ အဗ္ဘုတာ ဓမ္မာ ရညေ စက္ကဝတ္တိမှိ. ကတမေ စတ္တာရော? သစေ၊ ဘိက္ခဝေ၊ ခတ္တိယပရိသာ ရာဇာနံ စက္ကဝတ္တိံ ဒဿနာယ ဥပသင်္ကမတိ၊ ဒဿနေန သာ အတ္တမနာ ဟောတိ. တတြ စေ ရာဇာ စက္ကဝတ္တီ ဘာသတိ၊ ဘာသိတေနပိ သာ အတ္တမနာ ဟောတိ. အတိတ္တာဝ၊ ဘိက္ခဝေ၊ ခတ္တိယပရိသာ ဟောတိ. အထ ခေါ ရာဇာ စက္ကဝတ္တီ တုဏှီ ဟောတိ. သစေ ဘိက္ခဝေ၊ ဗြာဟ္မဏပရိသာ။ပေ။ ဂဟပတိပရိသာ။ပေ။ သမဏပရိသာ ရာဇာနံ စက္ကဝတ္တိံ ဒဿနာယ ဥပသင်္ကမတိ၊ ဒဿနေန သာ အတ္တမနာ ဟောတိ. တတြ စေ ရာဇာ စက္ကဝတ္တီ ဘာသတိ၊ ဘာသိတေနပိ သာ အတ္တမနာ ဟောတိ. အတိတ္တာဝ၊ ဘိက္ခဝေ၊ သမဏပရိသာ ဟောတိ၊ အထ ခေါ ရာဇာ စက္ကဝတ္တီ တုဏှီ ဟောတိ. ဧဝမေဝ ခေါ၊ ဘိက္ခဝေ၊ စတ္တာရောမေ အစ္ဆရိယာ အဗ္ဘုတာ ဓမ္မာ အာနန္ဒေ. သစေ၊ ဘိက္ခဝေ၊ ဘိက္ခုပရိသာ အာနန္ဒံ ဒဿနာယ ဥပသင်္ကမတိ၊ ဒဿနေန သာ အတ္တမနာ ဟောတိ. တတြ စေ အာနန္ဒော ဓမ္မံ ဘာသတိ၊ ဘာသိတေနပိ သာ အတ္တမနာ ဟောတိ. အတိတ္တာဝ၊ ဘိက္ခဝေ၊ ဘိက္ခုပရိသာ ဟောတိ. အထ ခေါ အာနန္ဒော တုဏှီ ဟောတိ. သစေ၊ ဘိက္ခဝေ ဘိက္ခုနီပရိသာ။ပေ။ ဥပါသကပရိသာ။ပေ။ ဥပါသိကာပရိသာ အာနန္ဒံ ဒဿနာယ ဥပသင်္ကမတိ၊ ဒဿနေန သာ အတ္တမနာ ဟောတိ. တတြ စေ အာနန္ဒော ဓမ္မံ ဘာသတိ၊ ဘာသိတေနပိ သာ အတ္တမနာ ဟောတိ. အတိတ္တာဝ၊ ဘိက္ခဝေ၊ ဥပါသိကာပရိသာ ဟောတိ. အထ ခေါ အာနန္ဒော တုဏှီ ဟောတိ. ဣမေ ခေါ၊ ဘိက္ခဝေ၊ စတ္တာရော အစ္ဆရိယာ အဗ္ဘုတာ ဓမ္မာ အာနန္ဒေ’’တိ.